Naibu Katibu Mkuu wa Wizara ya Kilimo, Prof. Peter Msofe, amepongeza jitihada za Wakala wa Nishati Vijijini (REA) katika utekelezaji wa miradi mbalimbali ya nishati inayolenga kuboresha maisha ya wananchi na kuchochea maendeleo ya kiuchumi.

 

Wakala wa Nishati Vijijini (REA) unawakaribisha wananchi na wadau mbalimbali kutembelea banda lake katika Maadhimisho ya Kitaifa ya Siku ya Chakula Duniani yanayofanyika katika Viwanja vya Usagara, Tanga Mjini, kuanzia Oktoba 10 hadi 16, 2026.

 

Karagwe, KAGERA📍

WAKALA wa Nishati Vijijini (REA) umeendelea kupanua wigo wa matumizi ya nishati safi ya kupikia nchini, baada ya kuwezesha ujenzi wa miundombinu ya majiko ya kisasa na mifumo banifu mkoani Kagera, hatua inayolenga kulinda afya za wanafunzi na walimu pamoja na kutunza mazingira.

Uwekezaji huo umeshuhudiwa katika Shule ya Sekondari Ruhinda iliyopo wilayani Karagwe mkoani humo, ambapo takriban shilingi milioni 60 zimetumika kukamilisha ujenzi wa jengo jipya la jiko la kisasa; usimikaji wa mifumo ya nishati safi ya kupikia pamoja na ununuzi wa tani 13 za kuni mbadala (Kuni poa).

Akizungumza baada ya kutembelea shule hiyo tarehe 12 Oktoba, 2026, Mkurugenzi wa Teknolojia za Nishati Mbadala na Jadidifu kutoka REA, Mhandisi Advera Mwijage, alisema mradi huo umetekelezwa kupitia mkataba wa ruzuku uliosainiwa tarehe 20 Agosti, 2026 kati ya REA na Halmashauri ya Wilaya ya Karagwe ambao ndio walikuwa waratibu wa ujenzi huo.

Mhandisi, Advera alibainisha kuwa REA imeiwezesha shule hiyo ya Ruhinda ambayo inahudumia zaidi ya watu 100; kwa kujenga jiko ya kisasa na kusambaza tani 13 za kuni poa (kuni mbadala) kwa ajili ya kianzio, vyote vikiwa na thamani ya takriban shilingi milioni 60.

Kwa upande wake, Mkuu wa Shule ya Sekondari Ruhinda, Bwana Ambruse Abel, amemshukuru Wakala huo na Serikali kwa ujumla akieleza kuwa mradi huo umekuwa chachu ya kuongeza ufaulu kwa wanafunzi takribani 700 wanaosoma shuleni hapo.

"Sasa hivi chakula cha wanafunzi kinapikwa katika mazingira bora, salama na kwa muda mfupi sana tofauti na zamani. Kipindi cha nyuma wakati wa mvua, chakula kilikuwa kinachelewa sana na afya za wapishi wetu zilikuwa hatarini kwa sababu ya moshi mkali," alisema Bwana Abel.

Aliongeza kuwa mradi huo umeisaidia shule hiyo kuokoa kiasi kikubwa cha fedha zilizokuwa zikitumika kununulia nishati za kiasili, ambapo awali takribani shilingi laki nane (800,000/-) zilitumika kila msimu kwa ajili ya kununulia kuni na mkaa.

Hadi sasa, jumla ya shule 52 za Tanzania Bara zimeshanufaika na mpango huo wa REA unaolenga kuhamisha taasisi za umma kutoka kwenye nishati zisizo safi na salama na kuelekea matumizi ya nishati salama na endelevu.

• MWISHO –